Espainiako Zientzia eta Teknologia Sistemaren (SECYT) egituran lau jarduera eremu daude: ikerketa-, garapen eta berrikuntza- (I+G+I) sistema publikoa; I+G+I laguntzeko erakundeak; konpainiak; eta gizartea. Azken urteetan, Espainiako I+G gastua (BPGaren % 1,07 2004an) nabarmen hazi da, urteko % 25 baino gehiago hain zuzen ere, ikerketa-jarduerak zabaltzeko konpromiso publikoei eta pribatuei esker.

Bilbon ESS Zentroa eraikitzearen helburua Espainia bikaintasun zientifikoaren maila gorenetan kokatzea da, Azpiegitura Zientifiko Handien Maparen barnean.

Zientzia eta Teknologia Instalazio Bakarren Mapa (ICTS) ere badago, eta ikerketa-alor ezberdinetan aritzen diren Espainian sakabanatutako berrogeita hamar instalazio baino gehiago hartzen ditu barne. Maparen gaineko hitzarmenak inoiz ez bezalako bultzada ematen dio Espainiako ikerketari.

Ikerketa Erakunde Publikoek (OPI) I+G+I jarduera gehienak aurrera eramaten dituzte finantzaketa publikoarekin, eta sarritan plan nazionaletan sartutako programak kudeatzen dituzte. OPI nagusia Zientzia Ikerketarako Goi Kontseilua (CSIC) da. Badira ere beste zentro batzuk: Energia, Ingurumen eta Teknologia Ikerketako Zentroa (CIEMAT); Espainiako Geologia eta Meatze Institutua (IGME); Espainiako Ozeanografia Institutua (IEO); Nekazaritza eta Elikagai Ikerketa eta Teknologia Institutu Nazionala (INIA); eta Kanariar Irletako Astrofisika Institutua (azken horretan Kanariar Irletako gobernuak parte hartzen du baita ere).

CSIC Espainiako ikerketa-erakunde publiko handiena da, eta 2389 zientzialarik eta graduatu aurreko eta graduondoko 3896 ikerlarik lan egiten dute bertan, unibertsitateekin eta beste erakunde batzuekin elkartutako 134 institututan eta unitatetan banatuta (2006).

CIEMATek ikerketa teknologikoa eta garapen proiektuak gauzatzen ditu, eta erreferentzia-puntu garrantzitsua da. Espainia maila teknikoan eta nazioarteko foroetan ordezkatzen du, eta gobernu agentziei alor horri buruzko aholkularitza ematen die. CIEMATen 1200 pertsona inguruk egiten du lan, eta horietako % 47 unibertsitateko graduatuak dira.

Espainiak erabakitasun sendoa agertu du Europan neutroi zientzietarako estrategia koherentea garatzeko, Bilboko ESS Zentroa kontuan hartuz:

• 20 urtez, ILLeko kide zientifikoa izan da, eta guztira 41 milioi euro inbertitu ditu 1986tik aurrera
• ISISi gero eta ekarpen handiagoak egin dizkio, guztira 9 milioi euro 2005etik aurrera
• zientzia-ekoizpen garrantzitsuak, 2.122 dokumentu 1997tik 2007ra
• erabiltzaile komunitate aktiboa, 250 kide baino gehiagorekin; hau da, Europako neutroien erabiltzaile komunitatearen % 10 
• urteetan zehar, gero eta  ikerketa-gai zabalagoak
• erakunde aktibo gehienen emaitzak handitu dira
• maiz argitaratzen duten autore zientifiko gehiago
• Espainia munduko zortzigarrena da emaitza zientifikoetan, eta seigarrena dokumentukako aipamenetan, arloan emaitza gehien dituzten hogei herrialdeen artean.
• nazioarteko lankidetza-maila handia lan eremuan
• Eremu honetan Espainiak egindako ikerketak lotura zuzena du bertako ikertzaileek munduko beste herrietako neutroi iturriak gero eta eskurago izatearekin, horiek baitira eremuko ikerkuntzaren oinarria.

Espainiako zientzia-ekoizpenaren erdia baino gehiago Frantziarekin lankidetzan egiten da (% 54,8); izan ere, ILL da Espainia atxiki zen lehen neutroi iturria. Espainiak lankidetza estua du Erresuma Batuarekin (% 15), Alemaniarekin (% 13,4) eta Estatu Batuekin (% 13,9). Iturria: ISI Thomson

Bilbon ESS Zentroa eraikitzeak Espainia bikaintasun zientifikoko mailarik gorenetan kokatzeko asmo sendoa islatzen du, Azpiegitura Zientifiko Handien Maparen barnean.